اخواني السلام عليكم ورحمة الله وبركاته بغيت اسئلكم متى يربط الطير اذا بدا يحذف ولا كيف وهل اقدر أأخر حذف الطير لان بعض الحرار يحذف بدري ولايلحق على الكراوين ومتى تغسل فروخ البحريات بالعاده لاني سمعت انها اخر ماتغسل من الطيور وكيف تعليف الطير بالمقيض هل يوضع العلف على الوكر او مثل مربط جابوه في قناة الواحه يضعون العلف على حقت تقطيع اللحم او السلطه والسمان مربوط فيها ارجو التوضيح من الاخوان والله يجزاكم خير ويرحم والديكم عن النار

بسم الله الرحمن الرحيم

هلابك أخوي فلاح ...

طبعاً الحر إذا أخرته ماربطته .. إحتمال إنه يتأخر ويطلع آخر الطيور إذا نقلوا الناس ... وإذا ربطته بدري طلع بدري ... وكل العمليه تعتمد على العلف والجو اللي فيه الطير ... وتأخير الطير عن الحذف .. وأنت عارف إن وقت الكراوين وقت يميل للحراره أكثر من البروده فلازم تقصر على الطير بالعلف ... عشان مايحذف ...

أما فروخ الشياهين .. ماعندي علم كافي عنها لكن اللي أعرفه إنها وقت الربطه تحذف بعض الريش وتصوم على الباقي حتى ظهور نجم سهيل وبعدها تبدأ بالتحذيف اللي عليه الكلام ... وقليل منها اللي يصفّي كامل ...

وأما عن طريقة التعليف بالمربط ... نعم كل طير تعطيه العلف على وكره .. هذا إذا كانت الطيور مربوطه بالأرض ... أما إذا كانت الطيور طلق ... أتوقع إنهم يطفون اللمبه ويجونهن واحد واحد يعطونهن علفهن ...

أخوي فلاح أتمنى إن أكون أفدتك ولو بشيئ ....

,,,,,,,,,,,,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,,,,,,,,,

خوي ابوشعلان صراحه جهد تشكر عليه والله يعطيك عافيه والله يعينك تتحمل الاسئله مني لاني غشيم واسئلتي واجد