ابو عهد
22-04-07, 11:28 AM
بسم الله الرحمن الرحيم
السلام عليكم ورحمة الله وبركاتة ...
اسعد الله ايام اخواني بكل خير
الحقيقة اذا جلست مع الشيبان راعين الصيد منول وقامو يسولفون تسمع العجب العجاب ...
مرة جالس بمجلس شيبان وانا بطرف المجلس اسمعهم يسولفون واحد يقول تذكر يابو فلان يوم نقنص عام 88 هجري كم من الحباري ذبحنا اللة العالم انه فوق السبعين....
والثاني يقول ولا القميري يوم نملا صندوق الفرد حق ابو فلان ...
وانا طايرة عيوني واطلع راسي مع باب المجلس واشوف طيري واقول الله يخلف عليك ولا وحدة هالسنة
...
وقعدنا شوي يوم دخل رجال كبير مرة الله يكون بعونة وقالو جاكم مبيد الارانب ولا معة شيهانة تقطع القلب ( ما شاء اللة تبارك الله ) وانا بصراحة مااعرف الرجال سلم وسلمنا ... وقال مشاء الله منهو راعي هالطير الي برى انا ارتزيت شوي وعدلت جلستي وقلت ( مقدم يبو فلان ) قال لا انا الشغلة هذي تاركة من يجي عشر سنين لكن الطير طيب الله يبارك لك فية هو ذبح هالسنة !!!
جاء على الجرح وقلت يا جماعة عطوني فرصة اشرح لكم ...
حنا والله تولعنا بزمان ماهو زماننا لكن الله يرزقنا رزق وسيع وابن ادم ما يطول الا المكتوب لو يسعى من الحين الى بكرى.
قال واحد من الجالسين وش بلاك تنقل هالطيرة ( يقصد الشايب ) ...
ضحك وقال هذي واحد من عيالي عمرها فوق 14 سنة ذبحت فيها من الصيد قومة وقعدة ما باقي الا اعلمة على الادمي هههههههه ...
ما اطول عليكم ولكن القلب في كلام واجد ...
الله يرزقنا رزق من عندة ...
والحمد لله رب العالمين..
ولكم مني جزيل الشكر .
بانتظار ما بداخل القلوب من قل الصيد !!!
اخوكم
ابو عهد
محمد المعارك
22-04-07, 12:40 PM
صدقت يابو عهد ... السنين الاخيرة الصيد قل بالحيل وما عاد يسوى الطلعة
( مــا شــوف والله للصـقـارة مجـالـي*** نقفي ونقبـل يالحميـدي علـى ويـش) بدر الحويفي.
وبالنسبة لصيد الطيور المهاجرة ... انا طموحي اني اشبع في البر يعني ما آخذ معي حافظة وهذي قمة الطموح .... الله يخلف علينا.
...
العام قبل الماضي قابلت احد الصقاقير المحترفين وسألته عن الصيد وكان الموسم في ربعه الأخير يعني ما باقي الا شهر واحد وتربط الطيور.
قال : هالسنة فيه حبارى
قلت كم صدت انت ؟
قال : صدت واحدة !!
:( :confused:
الله يجيب الرزق ومشكور اخي ابو عهد مرة أخرى .
وبارك الله فيك.
ابو صقر
22-04-07, 01:18 PM
والله يابو عهد ياخوي ان كلامك صحيح ......
رغم اني مانيب صقار بس اطلع معهم اتونس
بس فيه سؤال مهم ويمكن يزعل شوي بس الواقع يزعل في بعض الاحيان (تظل وجهة نظر)
.........................................ايش اسباب نقص الصيد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اسباب كثيره منها
*توفر السيارات القويه والسريعه
*توفر الاسلحة الفتاكه
*توفر اجهزة تحديد المواقع
*توفر طيور على مستوى عالي
*زيادة النعمة ولله الحمد وتوفر السيوله وهذا شجع كل من هب ودب يدخل في هالمجال
بقي اهم سبب لانه هو اللي احنا نقدر نتحكم فيه الا وهو............ الصيد الجائر..........
مثل ماهو واضح في القصه اعلاه من كميات كبيرة تزيد عن الحاجه
وفيه قصص انا سمعت عنها ان الصيد يتعفن ويضطرون يتخلصون منه في الصحراء
مع الاسف هذا الموضوع حساس ويمكن يزعل بس مع الاسف عندنا سياسة انا ومن بعدي الطوفان حتى في المواقع البريه والفياض والمتنزهات تحصل الواحد يستمتع في الموقع ويستانس وبعدين ماعليه من اللي يجي بعده
يخلي الموقع مزبله ((اعزكم الله))
عندنا ازمة فكر بس ماهوب ازمة او نقص صيد (تقدر تروح في اوربا او امريكا وتصيد في كميات كبيره... اشك)
والله من وراء القصد
محمد الديحاني
22-04-07, 01:32 PM
مداخلة
بسم الله الرحمن الرحيم
الموضوع جازلي لانة بالصميم..........
ابو عهد.............مرة كنا في العرمة بالتحديد شعيب الجريذي ومعنا شايبا من شبانا وجنبة واحدا من الربع ويقول يابو فلان مرة ضاهر من اهلي الفجر قانص"على رجلية" قاطعا هالشعيب ولا بشوفتي لهاك الضبي توة ظاهر هاك الضلع "يعني ضلع الطوقي وهو في بطن الشعيب الله العالم ان المسافة حوالي الــ800م الى كيلو ::مشاء الله على الشوف" المهم قال "تراة بواردي الى قبل مايطيح الله يقومة بالسلامة" وانا انبطح وامد البلجيك وانا احترية لين ظهر على علو الضلع ووقف معطيني جنبة كلة وانا امدها والله اني يالله اميز راسة لاكن على اليمة......................يقول وانا ارمية والله مادري هي فية ولا لا لكن عن قولة انة راح يقول يوم اخذة يوم اتقا عن الضبي......
والله وشيل بندقي وامشي رايح يمة واظهر الضلع بعد والله وقة طويل بس وصل لراس الضلع يقول واتهايق الى فيه دم والله اني ماصدقة وامشي مع جرة الدم يقول الى هو طايح على جنبة ولا هي ضاربة كتفة الايمن وظاهرة من دون ارقبته....يقول واشيل هاك العــــــود الفحل والله ماوصلة اهلي الى مافيني عرقا ينبض"هذا نوع من انواع التعبير عن التعب":D
الشاهد::::
الشوف الصافي
توفر الصيد
قوة باس الرياجيل
الحاجة
شكرا يابو عهد على التطرق الى هذا الموضوع الشيق,,,
فهدالدوسري
23-04-07, 12:10 AM
الاخ الغالي
ابو عهد
السلام عليكم
اخي الحبيب نعم عندما نجلس مع من هم اكبر منا تسمع مثل هذي القصص
ولكن اذا قرانتها بالواقع الان تجد اختلاف جذري عما هو عليه الحال
نعم اقولها ((هم السبب)) قتلو حتي اسرفو في القتل
واصبحت بلادنا الان تروي القصص عن الحباري والوعل والمها والنمر العربي والذيب العربي
وكثير من الحيوانات التي لم نعد نشاهدها بل نسمع عنها
اخوك
خشم الحصان
............
نغزه.......والثاني يقول ولا القميري يوم نملا صندوق الفرد حق ابو فلان ...
دقشه..... اسمع صندوق (فرد) ماذا نسميها اليس صيد جائر وقتل ارجو الا نربطها (بالجوع والفقر)
صدمه...... بعد خمسين سنه اولد اولدنا سيتفرجون علي صور طيور وسيقلون الله في بلادنا كانت طيور مثلما نقول نحن الان
الله كان المها والغزال والوعل موجوده .........
همسه...... ام كلثوم الله يعفو عنا وعنها تقول(كان زمان)...... لسي فاكر
ثامرالماضي
23-04-07, 08:33 AM
بسم الله الرحمن الرحيم
مشكور أخوي أبو عهد ... وصدق أخوي خشم الحصان الشيبان هم من أعدم الصيد ... بعد إقفال قناة السويس الواقعة بين مصر والسعودية ... وقفت هجرة الظباء والوعول والكثير من الحيوانات ... ولكن إستلموها عندنا الشيبان ماهوب كلهم ولكن بعضهم . وقضوا عليها ...
وبالنسبة لقلة صيد الحباري .... عندنا شايب إذا جينا من المقناص يقعد يضحك يقول بشروا عساكم لقيتوا جرّه ... شف وين وصلت ماقال عساكم لقيتوا حبارى يقول عساكم لقيتوا جرّه ...
لاهنت أخوي أبو عهد ... على هالموضوع الرائع ...
وننتظر المزيد ... من كل جديد ...
,,,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,,,
ابو عهد
23-04-07, 09:29 AM
بسم الله الرحمن الرحيم
اخي :
صقر
ابو صقر
راعي اللاند
خشم الحصان
ابو شعلان
اشكركم على المرور ...
والشكوى لله الرزق مقسوم من الله وهذي سنة الحياة ما احد يطول غير المكتوب لة ...
وانشاء الله تبي تزين الامور ..
اشكركم
اخوكم
ابو عهد
ذيب نجد
26-04-07, 02:07 AM
الصراحه يا اخوان الموضوع محزن للغايه
واتمنى ان تعود الطبيعه الى ما كانت عليه وتعود الظبى والوعول والحباري .....
وفيه مثل يقول ( التمني راس مال المفلسين )
سلا111111111111111م
ابوسديم
26-04-07, 12:00 PM
حياك الله أخي ابوعهد
ومشكور على هذا الموضوع الجدير بالمناقشة وأعتقد أن الصيد الجائر هو السبب الرئيس في إنقراض هذه الحيوانات
بالأمس كنت أتحدث مع أحد كبار السن وأخبرته عن رحلتنا للربع الخالي وقال : مالقيتو وعول؟
قلت له وانتم خليتوا لنا شي !!
قال اذكر رحنا مره على لوري وجيب وقفنا اللوري وكنا محملين مويه وبنزين باللوري ودخل ثلاثة من الربع على الجيب وحنا قعدنا عند اغراضنا ويقول ان راعين الجيب لقو لهم مجموعة وعول عددها 25 في قاع بين العروق وقالهم واحد لاترمون الا من اخر القطيع وتقفوهن ضحوية الى ان ابادوهن جميعا ويوم عدوهن حصلوهن 24 رجعوا وحصلوا واحد مصاب ومبتعد شوي واستلحقوه ويقول جابوهن لنا وحنا معنا ملح (نملحهن ونعلقهن) قلت له ليش ماصدتوا بس اللي يكفيكم قال قعدنا ثلاثة ايام وصدنا 88 ويوم رجعنا وزعناهن على الربع
أكرر الشكر لك أخي على هذا الموضوع المهم
ابو فراس
26-04-07, 01:08 PM
ابو عهد
حياك الله على فتح هالموضوع وتأييد ابو جراح يوم قال
نعم اقولها ((هم السبب)) قتلو حتي اسرفو في القتل
واصبحت بلادنا الان تروي القصص عن الحباري والوعل والمها والنمر العربي والذيب العربي وكثير من الحيوانات التي لم نعد نشاهدها بل نسمع عنها
خوفي اننا بعد مدة نبي نقول كان فيه ضبان عندنا وقميري
ابو عهد
26-04-07, 11:55 PM
بسم الله الرحمن الرحيم
احيي اخواني كل باسمة على المرور واشكركم على ردودكم.
والله يزينها الايام الجايه
اخوكم
ابو عهد
يعطيك العافية يابوعهد ومواضيعك دائمآ في الصميم00
لكن ؟
ليش ياشباب نحط حرتنا بها الشيبان يعني بالله عليكم لو حصلنا مثل ماحصلوا نبي نصيد على قدنا وكفايتنا
لاأعتقد بل أجزم نبي نبيد أكثر منهم وخاصة بعد توفر أدوات الصيد من أجهزة وسيارات وخرائط ووو....
تبون الدليل ؟
شوفوا ربيعنا إذا راحوا برا وش يسوون00
أنواع الإبادة مع العلم انه كله بحسابه00 لكن مايهم00 المهم يصورون وبس ويفتلون عضلاتهم على هاالكائنات اللي مالها حيل ولاقوة :confused:
والصيد ياجماعة الخير يقل كل سنة عن الأخرى والسبب الذنوب وقل البركات في الأرض والدليل الطيور المهاجرة في السماء وليست في الأرض ومع ذلك تسمع من يخرج ولايصيد شئ أو يصيد صيد مايسوى العنوة..
أقول : والخلاصة :
الصيد قل وعذبتنا المطاريش00
نقبل ونقفي من ولعنا على ماش0
.
يبي يجي يوم وقولوا ماقال خزام
مانتب لاقين ولا وداودة:D
إلى صار الشجرة تحته عشرة و70 هايلكس بالشعيب
لاتنسون تاخذون معكم بنات المذن ياالله من فضلك :p
يعطيك العافية أبو محمد ;)
ابو عهد
28-04-07, 10:51 AM
بسم الله الرحمن الرحيم
الاخ
الرهدن
خزام
اشكر لكم المرور ..
اخوكم
ابو عهد
النداوي
08-05-07, 04:41 PM
حقيقة ولكن على قولت أخونا خشم الحصان
كان زمان لسه فاكر
السبب هو الصيد الجائر والإسراف المقيت
وحب التفاخر في كثرة الصيد ولا حول ولا قوة الإ بالله
أخوك أبو عبدالله
ابو عهد
09-05-07, 01:54 PM
اخي
النداوي
اشكر لك مرورك
وشكرا على التعليق
اخوك
ابو عهد
عاشق الشاص
28-12-07, 11:08 PM
والله انا راعي صيد بنادق عمري 16 وأحب الصيد وعندي شوزن ام حبه اخاف ما ألحق على شي